Close

I tae ake mātou ki AA nā te mea kua kore tō mātou kaha ki te whakahaere tika i te inu waipiro. He uaua hoki te whāki atu kua koretake mātou ki te whakahaere tika i te inu waipiro. I rongo anō mātou i ngā kōrero a ētahi atu mema, he koretake anō rātou ki te whakahaere tika i te inu waipiro. Ka kite hoki mātou i ētahi atu tāngata wara waipiro e rongo ana i te kaniawhea, i te mokemoke, i te wawata kore me te rāwakiwaki pēnei i a mātou.
I whakatau mātou ki te āta titiro ki te pānga o te wara waipiro ki tō mātou ora. Anei ētahi pātai i whakautu mātou i runga i te pono. Mēnā nui ake i te whā ā mātou whakautu ki te ĀE, kua raruraru tā mātou inu waipiro. Ka pēhea nei koe? Kia mahara ake, kāore he whakamā i tō anga rae ki te rae ki te raruraru wara waipiro.

Whakautua ēnei pātai ki te āe, ki te kāo rānei

1. I whakarite koe ki te whakamutu inu waipiro mō te kotahi wiki, neke atu rānei, engari kāore e rua rā noa iho kua hoki anō koe ki te inu?
2. Kei te hiahia koe kia kaua te tangata e whiu kupu ki runga i a koe mō tō inu waipiro – kia mutu rānei tā rātou tohutohu i a koe?
3. Kua inu koe i tētahi atu inu rerekē i runga i te tūmanako e kore koe e haurangi haere?
4. I te tau kua hipa, kua mate inu koe i tō ohonga ake hei whakaihihi i a koe?
5. Wenerau ana koe ki te hunga kāore e raruraru i te inu waipiro?
6. I te tau kua hipa, i raruraru koe i te inu waipiro?
7. I te tau kua hipa, i raruraru koe i te kāinga i te inu waipiro?
8. Ka whakapau kaha koe ki te whiwhi inu anō i tētahi pāti e ngata ai te mate inu?
9. Ka tohe tonu koe ki a koe anō, ka āhei koe te whakamutu inu waipiro ahakoa tē hiahia ka haurangi tonu koe?
10. I matangaro koe i te mahi, i te kura rānei nā te inu waipiro?
11. Ka tīrehe koe i ētahi wā?
12. I hua ake te whakaaro ka ora ake koe i te kore o te inu waipiro?

He aha te kaute whakamutunga?

I whakautu koe i te ĀE ki ngā pātai e whā neke atu rānei? Ki te pērā kua raru koe i te waipiro. Nā te aha i kōrero pēnei ai mātou? Nā te manomano tāngata i kī pērā i ngā tau maha kua hipa. Nā te upoko pakaru rātou i mōhio ai ki a rātou anō. Engari, māu anō e whakatau mēnā e tika ana a AA mōu. Kia ngākau tapatahi koe ki tēnei take. Mēnā ko te ĀE te whakautu, ka koa mātou ki te whakaatu atu ki a koe he pēhea tā mātou aukati i te inu waipiro. Waea mai.

Kāore a AA e taurangi atu ki te whakatau i ngā raruraru o tōu ao. Engari ia, ka whakaatu atu i tā mātou ako ki te noho ki te ao kore waipiro “kotahi rā i te wā kotahi.” Ki te kore he inu tuatahi, kāore he inu tekau. Ā, ka panaia te waipiro ki rahaki, i reira ka kite mātou i te ngāwari ake o tōku ao.

He huarahi anō māu

E tūtohi ana mātou me haere mai koe ki tētahi hui, me whakapā mai rānei ki tētahi tangata o AA ki te kōrero mō tō raruraru mēnā neke atu i te whā ō whakautu ki te ĀE.

He ratonga waea 0800 229 6757 / help@aa.org.nz tā Alcoholics Anonymous pō noa, ao noa. Māna anō koe e hono ai ki ngā tūao o tō rohe. Ka koa ngā tūao nei ki te whakautu i ō pātai, ki te tuku rānei i a koe ki ētahi atu mā rātou koe e āwhina.

 

Te Inoi Mahurutangi (oro)